تمام امت مسلمہ کو رمضان المبارک کی آمد مبارک ہو:- اعجاز احمد

سرسید اجوکیشن مشن کے جنرل سیکرٹری اعجاز احمد نے اُمتِ مُسلمہ کو رمضان المبارک کی آمد پر مبارکباد دیتے ہوئے کہا ہے کہ اہل ایمان رمضان المبارک کا ایمانی جوش و خروش کے ساتھ استقبال کریں، دعا ہے کہ اللہ تعالیٰ ہم سب کو توفیق دے کہ ہم رمضان المبارک کی جملہ برکتوں، رحمتوں، نعمتوں اور سعادتوں سے اپنے ظاہر و باطن کو مالا مال کرسکیں۔ رمضان المبارک اللہ کریم کا مہمان مہینہ ہے، امت مسلمہ سے صبر و استقامت، ایثار اور تقویٰ کا متقاضی ہے، اللہ کو راضی کرنے اور مغفرت کی ان انمول گھڑیوں سے امت محمدیہ زیادہ سے زیادہ فائدہ اٹھائے۔

اعجاز احمد نے کہا کہ رمضان المبارک بھائی چارے کے فروغ اور اسلامی ثقافت کے پرچار کا مہینہ ہے، یہی ماہ مقدس ہے جو امت مسلمہ کو اتحاد، یکجہتی، صبر و ایثارکا درس دیتا ہے، معاشرے کے پسے اور مفلوک الحال طبقات کو مشکلات سے نجات دلانے کوشش کرنا بھی رمضان المبارک کے مقاصد میں سے اہم ترین ہے، اسلام لوگوں کی مدد کرنے اور مواخات کے عظیم رویوں کو اپنانے کا درس دیتا ہے، معاشرے سے غربت، افلاس، بھوک، انتہا پسندی اور دہشت گردی کے خاتمے کیلئے سعی کرنا ہرمسلمان پر فرض ہے۔