سرکاری اسکول کباڑ خانے میں تبدیل — ٹرن کیول زون کوٹرنکہ میں سرکاری پرائمری اسکول دس سال سے مقفل، فاروق انقلابی کا محکمہ تعلیم پر سخت حملہ

جی این ایس آنلائن نیوز پورٹل 

راجوری جون ۰۴۔۔کوٹرنکہ، ٹرن کیول زون – حیران کن انکشافات سامنے آیا ہے کہ ٹرن، کیول زون (کوٹرنکہ) کا گورنمنٹ پرائمری اسکول گزشتہ دس سالوں سے زمین دینے والے فرد کی جانب سے غیر قانونی طور پر مقفل ہے، جس کی وجہ سے مقامی بچوں کو تعلیم کے بنیادی حق سے محروم رکھا گیا ہے۔ یہ عمارت، جو تعلیم و تربیت کا مرکز ہونی چاہیے تھی، اب کباڑ اور ناکارہ سامان کا گودام بن چکی ہے۔

پی ڈی پی کے سینئر رہنما فاروق انقلابی نے اس سنگین صورتحال پر محکمہ تعلیم کی شدید مذمت کی ہے۔ انہوں نے کہا: “ہم نے کئی بار افسران سے رابطہ کیا اور درخواستیں دیں، لیکن کوئی کارروائی نہیں کی گئی۔ افسران نے ان بچوں کی حالت زار کو نظر انداز کر دیا ہے۔”

انہوں نے مزید کہا کہ اس تنازعے کی بنیاد صرف ایک معمولی مسئلہ ہے – باورچی کی تقرری – جو سراسر محکمہ تعلیم کی ذمہ داری ہے۔ “یہ صرف نااہلی نہیں بلکہ ان بچوں اور ان کے والدین سے سراسر ناانصافی ہے۔”

انقلابی نے خبردار کیا کہ اگر اسکول فوری طور پر نہ کھولا گیا، تو والدین اور مقامی لوگ خود تالا توڑ کر اسکول کا قبضہ واپس لیں گے۔ “یہ اسکول بچوں کا ہے، کسی کی ضد یا سرکاری لاپرواہی کا شکار نہیں ہونا چاہیے،” انہوں نے زور دے کر کہا۔

اسکول کی طویل بندش نے دیہی علاقوں میں تعلیمی نظام اور حکومتی نگرانی پر سنگین سوالات کھڑے کر دیے ہیں۔