تحصیلدار کوٹرنکہ کی یقین دہانی پر احتجاج ملتوی – دو ہفتوں پانی کی فراہمی بحال کی جائے گی

جی این ایس آنلائن نیوز پورٹل

کوٹرنکہ، 29 ستمبر :گاؤں کیول (لوئر)، بلاک بُدھل کے مکینوں ک جانب سے جل شکتی محکمہ کے خلاف مجوزہ پُرامن احتجاج کو تحصیلدار کوٹرنکہ جناب ساحل علی شاہ کی یقین دہانی کے بعد منسوخ کر دیا گیا ہے۔

یہ احتجاج گاؤں میں جل جیون مشن (JJM) اسکیم کے نفاذ میں مسلسل ناکامی اور پینے کے پانی کے سنگین بحران کے خلاف کیا جانا تھا۔ تاہم، آج تحصیلدار کوٹرنکہ، AEE اور JE جل شکتی محکمہ کے ہمراہ متاثرہ گرام پنچایت کیول لوئر پہنچے، جہاں انہوں نے مقامی لوگوں سے ملاقات کی، جاری اور نامکمل کاموں کا معائنہ کیا اور یقین دلایا کہ دو ہفتوں کے اندر پانی کی فراہمی بحال کر دی جائے گی۔

تحصیلدار جناب ساحل علی شاہ نے یہ بھی وعدہ کیا کہ وہ اس معاملے کو اعلیٰ حکام کے ساتھ اُٹھائیں گے تاکہ اسکیم کے زیرِ التواء کاموں کو مکمل کروایا جا سکے۔

سابق سرپنچ اور معروف سماجی و سیاسی کارکن محمد فاروق انقلابی نے ضلع انتظامیہ، بالخصوص ڈپٹی کمشنر راجوری، ایڈیشنل ڈپٹی کمشنر کوٹرنکہ اور تحصیلدار کوٹرنکہ کا شکریہ ادا کیا جنہوں نے بروقت کارروائی کی اور موقع پر آکر عوامی مسائل کو سنا۔

تاہم، فاروق انقلابی نے خبردار کیا کہ اگر دو ہفتوں کے اندر پانی کی فراہمی بحال نہ ہوئی اور زیرِ التواء کام شروع نہ ہوا تو عوام دوبارہ احتجاج پر مجبور ہوں گے۔

عوام کو اُمید ہے کہ انتظامیہ اپنی یقین دہانیوں پر عمل کرے گی اور جلد از جلد پانی کے بحران کا حل نکالا جائے گا۔