بدھل میں ترقیاتی پیش رفت، جاوید اقبال چودھری نے 13 کروڑ روپے کے سڑک منصوبے کا افتتاح کیا۔

جی این ایس آنلائن نیوز پورٹل 

راجوری فروری ۲۷۔۔۔حلقہ اسمبلی بدھل میں ترقیاتی کاموں کو ایک اہم تقویت اس وقت ملی جب رکنِ قانون ساز اسمبلی جناب جاوید اقبال چودھری نے طویل عرصے سے زیرِ التوا 6 کلو میٹر طویل ترن–کنگوٹہ سڑک منصوبے کا باضابطہ افتتاح کیا۔ تقریباً 13 کروڑ روپے کی لاگت سے تعمیر ہونے والا یہ منصوبہ مقامی عوام کا دیرینہ مطالبہ تھا اور اس کی تکمیل سے علاقے میں آمد و رفت کی سہولیات بہتر ہونے کے ساتھ ساتھ معاشی اور سماجی سرگرمیوں کو بھی فروغ ملنے کی توقع ہے۔
افتتاحی تقریب میں سیاسی و سماجی شخصیات، معززینِ علاقہ اور بڑی تعداد میں مقامی افراد نے شرکت کی۔ شرکاء نے اس منصوبے کو بدھل کی ترقی کی جانب ایک عملی اور نتیجہ خیز قدم قرار دیا۔ عوام نے امید ظاہر کی کہ بہتر سڑک رابطہ طلبہ، مریضوں، کسانوں اور تاجروں کو درپیش مشکلات میں نمایاں کمی لائے گا اور انہیں شاہراہوں، منڈیوں اور دیگر بنیادی سہولیات تک آسان رسائی حاصل ہوگی۔

اس موقع پر خطاب کرتے ہوئے جناب جاوید اقبال چودھری نے کہا کہ ماضی میں بدھل کو نظر انداز کیا گیا اور بعض سیاسی عناصر نے اسے محض ووٹ بینک کے طور پر استعمال کیا جبکہ بنیادی سہولیات فراہم کرنے میں ناکام رہے۔ انہوں نے کہا کہ عوامی مسائل کا حل اور بنیادی ڈھانچے کی مضبوطی ان کی اولین ترجیحات میں شامل ہے۔ انہوں نے یقین دہانی کرائی کہ بدھل کے ہر گاؤں اور بستی تک سڑکوں کا جال بچھایا جائے گا اور تمام ترقیاتی کام شفافیت، جوابدہی اور معیاری تعمیر کے اصولوں کے تحت مکمل کیے جائیں گے تاکہ عوام کو طویل مدتی فائدہ پہنچے۔

میڈیا کے سوالات کا جواب دیتے ہوئے انہوں نے کمیونٹی ہیلتھ سینٹر کوٹرنکہ اور پی ایچ سی بدھل سمیت دیگر طبی مراکز میں عملے کی کمی کا اعتراف کیا اور کہا کہ اس مسئلے کو جلد حل کیا جائے گا۔ انہوں نے مزید بتایا کہ دور دراز دیہی علاقوں میں جہاں طبی سہولیات میسر نہیں، وہاں نئے صحت مراکز قائم کرنے کی منصوبہ بندی جاری ہے تاکہ بنیادی طبی سہولیات عوام کی دہلیز تک پہنچائی جا سکیں۔

اس موقع پر پی ڈی پی کے سینئر رہنما اور سابقہ سرپنچ محمد فاروق انقلابی بھی موجود تھے۔ انہوں نے اس منصوبے کو علاقے کے لیے ایک تاریخی سنگِ میل قرار دیتے ہوئے جناب جاوید اقبال چودھری کا شکریہ ادا کیا کہ انہوں نے عوام کا دیرینہ مطالبہ پورا کیا۔ انہوں نے کہا کہ بدھل کی ترقی اور خوشحالی کے لیے اٹھایا گیا ہر مثبت قدم قابلِ تحسین ہے اور وہ عوامی فلاح و بہبود کے اقدامات میں اپنا مکمل تعاون جاری رکھیں گے۔
مقامی افراد نے امید ظاہر کی کہ ترن کنگوٹہ سڑک کی بروقت اور معیاری تکمیل نہ صرف سفری سہولیات کو بہتر بنائے گی بلکہ تجارت، تعلیم اور صحت کے شعبوں میں بھی مثبت تبدیلیاں لائے گی اور بدھل میں ترقی کے ایک نئے دور کا آغاز ہوگا۔