Author: admin

نئی دہلی: مولانا سید ارشد مدنی صدر جمعیۃ علماء ہند کی ہدایت پر جمعیۃ علماء ہند کاایک نمائندہ وفد مسلسل 19 روز سے شمال مشرقی دہلی کے متاثرہ علاقوں کا دورہ کر رہا ہے اور ہر ایک چیز کا بہت باریکی سے جائزہ لیکر ہر طرح کا تعاون کر رہا ہے۔ جمعیۃ کی طرف سے جاری کردہ ایک پریس ریلیز کے مطابق ریلیف کے ساتھ ساتھ مساجد و مکانوں کی باز آبادکاری کا سلسلہ بھی جاری ہے اور قانونی امداد بھی فراہم کی جارہی ہے۔

دوسری طرف پولس کا مسلمانوں کے تعلق سے جانبدارانہ روریہ بدستور جاری ہے۔ جمعیۃ کا کہنا ہے کہ متأثرین کی طرف سے مسلسل یہ شکایات موصول ہو رہی ہے کہ فسادمیں ملوث شرپسند عناصرکی جگہ بے گناہ مسلم نوجوانوں کو ہی زیادہ تعداد میں گرفتار کیا جا رہا ہے اور انہیں ڈرایا دھمکایا جارہا ہے۔

جمعیۃ کے نمائندہ وفد نے کہا، ”وفد نے کہا کہ شدت کے ساتھ یہ محسوس کرتاہے کہ پولس سیاسی دباؤ اوراپنی فرقہ وارانہ سوچ کے مطابق ہی کام کررہی ہے یہی وجہ ہے کہ اصل خاطیوں کو سامنے لانے کی جگہ وہ مسلم نوجوانوں کو ہی گناہ گاربناکر پیش کررہی ہے۔ جبکہ ملکی اور غیر ملکی میڈیا میں شائع ہونے والی رپورٹوں میں اس اندوہناک سچائی کو بار بار اجاگر کیا گیا ہے کہ پولس کی طرف سے شرپسندوں کو کھلی چھوٹ دی گئی اورچشم دیدگاہوں اور سوشل میڈیا پر وائرل ہونے والی ویڈیوز کے مطابق پولیس انتظامیہ نے شرپسندوں کے ساتھ ملکرمسلمانوں کو جو جانی و مالی نقصان پہنچایا ہے جس میں 15 مساجد تین مدارس اور سینکڑوں مکانات ودوکانیں شامل ہیں۔”

زیادہ ترواقعات میں پولیس یا تو تماش بین بنی رہی یا پھر شرپسندوں کے ساتھ ملکر ظلم و تشدد کرتی نظر آئی متأثرین کے مطابق جب ان لوگوں نے یہ دیکھا کہ شرپسند مسلسل ان پر حملہ آور ہیں اور انتظامیہ کی طرف سے کوئی مدد نہیں مل رہی ہے تو انہوں نے اپنا دفاع خود کرنے کا فیصلہ کیا مگر اب الٹا انہیں کو گرفتار کیا جارہا ہے اور ڈرایا دھمکایا جارہا ہے، تاکہ وہ شرپسندوں کے خلاف مقدمات درج کرانے کی جرأت نہ کرنے پائیں اور جو مقدمات کرائے جارہے ہیں انکو بھی صحیح طریقے پر درج نہیں کیا جارہا بلکہ ایک علاقے کے تمام نقصانات کی ایک ہی ایف آئی آر لکھی جا رہی ہے ان تمام چیزوں کو سامنے رکھتے ہوئے مسلمانوں کے درمیان خوف و ہراس کا ماحول ہے اور کافی تعداد ان لوگوں کی ہے جو ڈر اور خوف کی وجہ سے نامزد ایف آئی آر کرانے سے کترارہے ہیں انہیں تمام باتوں کو لیکر جمعیۃ علماء ہند کے ایک وفد نے دہلی پولیس کمشنر سے ملاقات کی اور ان کے سامنے تفصیل سے تمام شکایات کو رکھا۔

انہوں نے تمام باتوں کو بغور سنا اور ہرطرح کے تعاون کی یقین دہانی کرائی ہے نیز شمال مشرقی دہلی کے ڈی سی پی کو فون کر کے انصاف کے ساتھ کاروائی کرنے کی ہدایت بھی دی علاوہ ازیں خود متأثرہ علاقوں کا دورہ کرکے خوف و ہراس کو دور کرنے کی یقین دہانی کرائی ہے۔

حقیقت یہ ہے کہ فسادکے دوران پولس جس طرح شرپسند عناصرکے ساتھ کھڑی نظرآئی اور انہیں لوٹ ماراور قتل وغارت گری کی چھوٹ دی اس کے بعدسے پولس پر سے مسلمانوں کا اعتمادبری طرح مجروح ہو چکا ہے یہی وجہ ہے کہ اب وہ پولس کی طرف سے دی جانے والی کسی بھی یقین دہانی پر اعتمادکرنے کو تیارنہیں ہیں، یہ ایک انتہائی خطرناک صورت حال ہے کہ جب ملک کی ایک بڑی آبادی قانون نافذ کرنے والے اداروں کو لیکر محتاط روی کا مظاہرہ کرے اور ان سے انصاف کی توقع کرناہی ترک کردے ایسے میں وفد محسوس کرتاہے کہ انتہائی ضروری ہے کہ پولس عوام بالخصوص مسلمانوں میں جس قدرجلد ممکن ہو اپنا اعتماد بحال کرنے کی عملی کوشش کرے اور اس کی ایک بہترین صورت یہی ہے کہ وہ انصاف کے ساتھ کارروائی کرے۔

امیر شریعت حضرت مولانا محمد ولی رحمانی نے مرکزی وزیر داخلہ امت شاہ کے این پی آر کے تعلق سے پارلیمنٹ میں دیے گئے بیان پر اظہار خیال کرتے ہوئے کہا کہ امت شاہ کے بیان پر اس وقت تک بھروسہ نہیں کیا جا سکتا جب تک کہ شہریت قانون 2003 کے اصول و ضوابط میں تبدیلی نہ کر دی جائے۔

خیال رہے کہ حال ہی میں امت شاہ نے پارلیمنٹ میں اپنی تقریر کے دوران کہا کہ این پی آر میں کوئی ڈاکومنٹ نہیں مانگا جائے گا، کسی کو جواب دینے پر مجبور نہیں کیا جائے گا اگر کوئی شخص کوئی جواب نہ دینا چاہے تو نہ دے اور کسی بھی شہری کے نام کے آگے ‘ڈی’ یعنی ڈاؤٹ فل (مشکوک) نہیں لکھا جائے گا۔

امیر شریعت نے کہا کہ امت شاہ اور وزیر اعظم نریندر مودی عوام کے درمیان اپنی باتوں کا اعتبار اور بھروسہ کھو چکے ہیں، ان دونوں کی باتوں کا جھوٹ پورے ملک کے سامنے ہے۔ اس لیے امت شاہ کے اس بیان پر بھروسہ نہیں کیا جا سکتا، خواہ انہوں نے پارلیمنٹ میں یہ بیان دیا ہو، ایک طرف تو وہ یہ بیان دے رہے ہیں کہ کسی کو جواب دینا لازمی نہیں ہے اور دوسری طرف انہیں کی پارٹی کے وزیر اعلیٰ یوگی آدتیہ ناتھ یہ اعلان کر رہے ہیں کہ جو این پی آ ر کے سوال کا جواب نہیں دیں گے ان پر جرمانہ لگے گا اور ا ن کے خلاف کارروائی کی جائے گی۔ اب کوئی بھی سمجھدا ر آدمی آسانی سے اندازہ لگا سکتا ہے کہ جب امت شاہ کے بیان کی ان کے پارٹی کے ہی وزیر اعلیٰ کے سامنے یہ حالت ہے تواس کا آگے کیا حشر ہونے والا ہے۔

یہ بات کسی سے چھپی نہیں ہے کہ این پی آر کا عمل سٹیزن شپ ایکٹ 2003 کی بنیاد پر بنائے گئے رولزکے تحت ہونا ہے ، جس میں ”ڈی ” یعنی ڈاؤٹ فل بنانے کی بات او ر ویری فکیشن کی بات صاف طو پر لکھی ہے ۔اگر امت شاہ اپنے بیان میں واقعی سچے ہیں تو سٹیزن شپ ایکٹ 2003کے رولز ۳،۴،۵؍ کو بدل دیں۔ساتھ ہی تمام غیر ضروری اور قابل اعتراض باتوں کو ختم کر کے باضابطہ این پی آ ر کا نیا فارمیٹ جاری کیا جائے ۔ا ور جب تک یہ سب نہیں ہو تا سب بیان بازیاں زبانی جمع خرچ سے زیادہ کچھ نہیں ہیں ۔لوگوں کو ان بیانوں سے مغالطہ میں آکر اپنی تحریک کمزور نہیں کرنی چاہئے بلکہ اور زیادہ مضبوطی اور توانائی کے ساتھ تحریک کو اس وقت تک جاری رکھنا چاہئے جب تک حکومت کی معتبر قانونی تحریر میں ان سب چیزوں کے خاتمے کا اعلان نہ ہو جائے ۔

حضرت مولانا محمد ولی رحمانی نے کہا کہ مسلم اور غیر مسلم کی تفریق بی جے پی اور آر ایس ایس کی پالیسی ہے ، یہی پالیسی سی اے اے میں کام کر رہی ہے، اور اسی پالیسی کے پیش نظر پاکستا ن، بنگلہ دیش اور افغانستان سے ویزا کے ساتھ آنے اور زیادہ ٹھہر جانے والوںسے لی جانے والی رقم کے اسٹریکچرمیں بھی فرق رکھا گیا ہے، مسلمانوں سے تین سو، چار سو اور پانچ سو امریکی ڈالر لیے جا رہے ہیں اور غیر مسلموں سے ایک سو، دو سو اور پانچ سوہندوستانی روپئے لیے جا رہے ہیں، یہ مذہبی تفریق ہے، جو آئین ہند کے لحاظ سے غیر قانونی ہے۔