پہاڑی زبان میں ماسٹر ڈگری پروگرام   جموںیونیورسٹی میں کمیٹی کا اجلاس 3مئی کو منعقدہوگا

الطاف حسین جنجوعہ

جموں//پہاڑی زبان میں ماسٹر ڈگری پروگرام شروع کرنے کی غرض سے جموں یونی ورسٹی کی طرف سے تشکیل دی گئی کمیٹی کا اجلاس 3مئی 2019کو منعقد ہورہا ہے ۔ذرائع کے مطابق پہاڑی زبان کو ماسٹرڈگری پروگرام کے تیسرے اور چوتھے سمسٹر میں ’چوائس بیسڈ کریڈٹ سسٹم ‘کے تحت اوپن کورس کے طور شروع کرنے کا منصوبہ ہے ، جس پر پچھلے دو برس سے کام جاری ہے۔پہاڑی زبان کو تیسرے اور چوتھے سمسٹر میں’اوپن کورس‘کے طور شروع کرنے کے لئے اسسٹنٹ رجسٹرار اکیڈمک جموں یونیورسٹی نے تشکیل دی گئی کمیٹی کا 3مئی اہم اجلاس طلب کیا ہے جس میں اس کو حتمی شکل دینا متوقع ہے۔ذرائع کے مطابق کمیٹی کا اجلاس شعبہ اردو جموں یونیورسٹی میں منعقد ہوگا جس میں ڈئین فیکلٹی آف آرٹس کے علاوہ جموں یونیورسٹی میں شعبہ تاریخ ، شعبہ اردو ، شعبہ ڈوگری، شعبہ ہندی، شعبہ پنجابی کے سربراہان ،ڈائریکٹر پونچھ، ڈائریکٹر لائف لانگ لرننگ شعبہ جموں یونی ورسٹی، جموں وکشمیر اکیڈمی آف آرٹ ، کلچر اینڈ لانگویجز کے شعبہ پہاڑی کے مدیر اعلیٰ ڈاکٹر فاروق انور مرزا، پروفیسر وی ڈی سنگھ اور اسسٹنٹ رجسٹرار (اکیڈمک)شرکت کریں گے۔ پہاڑی زبان بولنے والے طبقہ نے جموںیونیورسٹی کی طرف سے کی گئی اس پہل کا بڑے پیمانے پر خیر مقدم کیاہے۔ پہاڑی زبان وادب سے جڑی شخصیات، جموں وکشمیر پہاڑی کلچر اینڈ ویلفیئر فورم کے علاوہ پہاڑی طبقہ سے وابستہ سیاسی لیڈران نے اس پہل کو خوش آئند قرار دیتے ہوئے اُمید ظاہر کی ہے کہ رواں برس تعلیمی سیشن سے اس کورس کو شروع کیاجائے گا۔پہاڑی طبقہ کے لوگوں نے وائس چانسلر جموں یونیورسٹی پروفیسر منوج کمار دھر کو مبارک باد پیش کی ہے۔