سرپنچ نے پھلنی میں ڈسٹری بیوٹری چینلز کے کام کا افتتاح کیا

 جی این ایس آنلائن راجوری

بلاک بدھل کے پھلنی گرام پنچایت میں محکمہ کمانڈ ایریا ڈویلپمنٹ جموں نے آج آبپاشی چینلوں کی تعمیر کا کام شروع کیا جس کا افتتاح سرپنچ پھلنی محمد اقبال ٹھکر نے سرپنچ کیول فاروق انقلابی، پرویز ملک اور فیلڈ انچارج شکیل احمد کی موجودگی میں کیا۔ کام کی تفصیلات بتاتے ہوئے سرپنچ گرام پنچایت کیول فاروق انقلابی اور سرپنچ پھلنی اقبال ٹھکرنے بتایا کہ علاقے میں 17.50 لاکھ روپے کی لاگت سے آبپاشی کے نالیوں کا کام شروع کیا گیا ہے جس سے علاقے کی تقریباً 55 ہیکٹر اراضی کو پانی فراہم ہو گا۔ فاروق انقلابی نے کہا کہ بلاک بدھل میں کمانڈ ایریا ڈویلپمنٹ کی جانب سے ترجیحی بنیادوں پر کام شروع کر دیا گیا ہے جس سے یہاں کے کسانوں کو فائدہ ہو گا۔

دونوں سرپنچوں نے ڈائریکٹر جنرل کمانڈ ایریا جموں سردار راجندر سنگھ تارا، پراجیکٹ آفیسر سردار ایم پی سنگھ، اے ایس سی او امیش گپتا، ایس سی اے ایس آفتاب ملک، اشونی گپتا اور فیلڈ اسسٹنٹ شکیل احمد کا پھلنی اور کیول میں آبپاشی چینلوں کا کام ترجیحی بنیادوں پر شروع کرنے پر شکریہ ادا کیا۔ انہوں نے عوام سے بھی اپیل کی کہ وہ محکمہ کے افسران کی مدد کریں تاکہ کام کم وقت میں مکمل ہو سکے اور علاقے میں پانی کی قلت کا مسئلہ حل ہو سکے۔
فاروق انقلابی نے کہا کہ بدھل کے علاقے میں کسانوں کو وقت پر پانی نہ ملنے کی وجہ سے بہت زیادہ نقصان اٹھانا پڑتا ہے جس کے لیے مزید آبپاشی کے راستے بنانے کی ضرورت ہے۔

اس موقع پر جان محمد، لیاقت علی، اقبال کھوکھر، منیر حسین سمیت کسان بھی موجود تھے۔